پاکستانی شوبز ستاروں کی مداحوں کو عیدالاضحیٰ کی مبارکباد

کراچی: (کوہ نور نیوز،ویب ڈیسک) عیدالاضحیٰ کے پرمسرت موقع پر پاکستانی شوبز ستاروں نے مداحوں کو بھی عید کی مبارکباد دی ہے۔ ملک بھر میں آج عید الاضحیٰ مذہبی عقیدت و احترام کے ساتھ منائی جا رہی اور سنت ابراہیمی کی پیروی کرتے ہوئے الله کی راہ میں جانوروں کی قربانی بھی کی جارہی ہے۔ عیدالاضحیٰ کے اس پرمسرت موقع پر پاکستانی شوبز ستاروں نے بھی مداحوں کو سماجی رابطوں کی سائٹ پر مبارکباد دی ہے۔ پاکستانی شوبز انڈسٹری کی مشہور و معروف جوڑی سارہ خان اور ان کے شوہر گلوکار فلک شبیر نے مداحوں کو عید کی مبارکباد دی، گلوکار فلک شبیر نے ہمیشہ کی طرح سارہ خان کو عید پر پھولوں کا گلدستہ پیش کیا اور عید الاضحیٰ کی مبارک باد دی۔ مشہور اداکارہ عائزہ خان نے اپنی بیٹی کے ہمراہ بکروں کے ساتھ کھڑے ہوکر تصویر بنوائی اور مداحوں کو عید کی مبارکباد دی۔ اداکار یاسر حسین نے بھی مسجد میں نماز عید کی ادائیگی کے موقع پر تصویر کو انسٹاگرام پر شئیر کیا اور سب کو عید الاضحیٰ کی مبارکباد دی۔ گلوکار عاصم اظہر نے بکروں کے ساتھ تصویر کو سوشل میڈیا پر شئیر کرتے ہوئے کہا کہ اللہ سب کی قربانی قبول فرمائے۔ اداکارہ ماورہ حسین نے بھی عید کی مبارک باد دیتے ہوئے کہا کہ اللہ ہم سب کی قربانی قبول کرے، اور اس کے ساتھ ہی ہماری بری عادتیں اور انا بھی اس عید پر قربان ہوجائیں۔