کورونا وائرس فیشن: بلغاریہ میں دیدہ زیب ماسک فروخت ہونے لگے

صوفیہ: (کوہ نورنیوز) کورونا وائرس سے بچاؤ کیلیے بلغاریہ کی ایک کمپنی نے خوبصورت ڈیزائن سے دیدہ زیب ایسے ماسک تیار کیے ہیں جن پر بچوں کی دلچسپی کو مدنظر رکھتے ہوئے جانوروں کی اشکال بھی پرنٹ کی گئی ہیں۔ عالمی خبر رساں ادارے کے مطابق بلغاریہ میں سماجی کاموں کے لیے مشہور ایک کمپنی نے کورونا وائرس کیخلاف عالمی جنگ میں حصہ ڈالتے ہوئے ایسے ماسک تیار کیے ہیں جو دیدہ زیب ڈیزائن سے مزین ہیں اور جن پر جانوروں کی اشکال بھی پرنٹ ہیں۔ اینجل بے بی نامی اس کمپنی کا دعویٰ ہے کہ یہ حوصلہ افزا ماسک انسانی موڈ میں مسرت لا کر مرض سے پیدا ہونے والے خوف اور تناؤ کو کم کرنے کا باعث بنتے ہیں۔ عمومی طور دستیاب ماسک سادہ ہوتے ہیں جسے پہننے والوں کو ترس کی نگاہ سے دیکھا جاتا ہے۔ کمپنی نے یہ ماسک شہریوں میں مفت تقسیم کرنے کا اعلان کیا ہے تاہم اس حوالے سے کمپنی نے ہدایت کی ہے کہ یہ ماسک ماہرین طب سے تصدیق شدہ نہیں اس لیے اس ماسک کو روزانہ کی بنیاد پر دھویا جائے۔ بچوں کی دلچسپی کے لیے ماسک پر جانوروں کی تصاویر بھی پرنٹ کی گئی ہیں۔