اکتوبر 2019: جاری کھاتے کا توازن مثبت ہوگیا، ماہرین حیران

کراچی : (کوہ نور نیوز) پاکستان کے جاری کھاتے کا توازن مثبت ہوگیا ہے جسے ماہرین حیران کُن قرار دے رہے ہیں۔ 4 سال کے بعد رواں برس اکتوبر میں غیرملکی سرمائے کی آمد انخلا کے مقابلے میں 99 ملین ڈالر زائد رہی۔ اس کی بنیادی وجہ درآمدات میں نمایاں کمی اور تارکین وطن کی جانب سے مستحکم ترسیلات زر تھیں۔ بی ایم اے کیپیٹل کے ایگزیکٹیو ڈائریکٹر سعد ہاشمی نے کہا کہ یہ بہت حیرت انگیز اور بہت بڑی خبر ہے۔ ساختی اصلاحات جیسے روپے کی قدر میں کمی، بلند شرح سود اور ڈیوٹیوں کے نفاذ کے باعث درآمدات میں ہونے والی مسلسل کمی کے پیش نظر رواں ماہ میں بھی کرنٹ اکاؤنٹ خسارہ مزید محدود ہونے کی توقع ہے۔ تاہم سعدہاشمی کے مطابق کوئی بھی جاری کھاتے کا توازن سرپلس میں جانے کی توقع نہیں کررہا تھا۔