مقبوضہ کشمیرمیں مارشل لا ہے، امریکی نائب وزیرخارجہ

واشنگٹن : (کوہ نور نیوز) امریکی نائب وزیرخارجہ برائے جنوبی ایشیا کا کہنا ہے کہ مقبوضہ کشمیرمیں بھارتی اقدامات بدترین ہیں۔ تفصیلات کے مطابق امریکا کے نائب وزیرخارجہ رچرڈ باؤچر نے اپنے بیان میں کہا کہ مقبوضہ کشمیرمیں مارشل لا ہے، مقبوضہ کشمیر میں اقدامات انسانی حقوق کی خلاف ورزی ہیں۔ رچرڈ باؤچر نے کہا کہ بھارت اب پاکستان پر دراندازی، دہشت گردی کا الزام نہیں لگا سکتا، بھارت نے ان اقدامات سے تاریخ مٹانے کی کوشش کی۔ امریکی نائب وزیرخارجہ برائے جنوبی ایشیا نے مزید کہا کہ بھارت نے خودمختار ریاست منصوبہ ختم کرنے کی کوشش کی، مقبوضہ کشمیر میں بھارتی اقدامات بدترین ہیں۔ واضح رہے کہ مسئلہ کشمیر پر سیکیورٹی کونسل کا ہنگامی اجلاس آج طلب کرلیا گیا، سلامتی کونسل کا اہم اجلاس پاکستان کی درخواست پر بلایا جا رہا ہے۔ اجلاس میں مسئلہ کشمیر کے مختلف پہلوؤں اور ان کو حل کرنے سے متعلق امور پر صلاح مشورہ کیا جائےجس کے بعد باقاعدہ اجلاس سے متعلق فیصلے کا امکان ہے۔ مقبوضہ کشمیر کی حیثیت بھارت کی جانب سے یکطرفہ بدلنے کے معاملے پر وزیرخارجہ شاہ محمود قریشی نے اقوام متحدہ کی سلامتی کونسل کا اجلاس بلانے کے لیے خط لکھا تھا۔