پنجاب کے ہر شہر اور دیہات کی ترقی چاہتا ہوں، عثمان بزدار

لاہور: (کوہ نور نیوز) وزیراعلیٰ پنجاب سردار عثمان بزدار کا کہنا ہے کہ غیرفعال واٹرسپلائی اسکیموں کی بحالی کے لیے اقدامات کریں گے۔ تفصیلات کے مطابق لاہور میں وزیراعلیٰ پنجاب سردار عثمان بزدار کی زیرصدارت اجلاس ہوا جس میں چیف سیکرٹری، چیئرمین منصوبہ بندی وترقیات، سیکرٹری تعمیرات اوردیگر نے شرکت کی۔ اجلاس میں پنجاب میں بنیادی سہولتوں کی فراہمی کے لیے نیا پروگرام شروع کرنے کا فیصلہ کیا گیا۔ وزیراعلیٰ پنجاب نے دہلیز پربنیادی ضروریات دینے کے پروگرام کی منظوری دے دی۔ سردار عثمان بزدار نے کہا کہ پروگرام پر مجموعی طور پر25 ارب روپے خرچ ہوں گے، صوبے کے ہرشہر اور دیہات کی ترقی چاہتا ہوں، بنیادی سہولتیں بہتر بنا کرعوام کو ان کا حق لوٹائیں گے۔ وزیراعلیٰ پنجاب نے کہا کہ صفائی ،پینے کے پانی اور سیوریج سسٹم کو بہتر بنایا جائے گا، غیرفعال واٹر سپلائی اسکیموں کی بحالی کے لیے اقدامات کریں گے۔ سردار عثمان بزدار نے کہا کہ صفائی بہتر بنانے کے لیے ضروری مشینری خریدی جائے گی۔ یاد رہے کہ گزشتہ ماہ وزیراعلیٰ پنجاب کا کہنا تھا کہ ماضی کے حکمرانوں نے ذاتی نمائش کے منصوبوں پر اربوں روپے کے وسائل برباد کیے۔ عوام سابق ادوار کے حکمرانوں کو یکسر فراموش کرچکی ہے۔ نیا پاکستان بن رہا ہے اور بن کر رہے گا۔ سردار عثمان بزدار کا کہنا تھا کہ صوبے میں نئے اضلاع اور تحصیلیں بنانے کے لیے کمیٹی قائم کر دی گئی ہے۔ کمیٹی کی سفارشات کی روشنی میں نئے اضلاع اور تحصیلیں بنائیں گے۔