شاہ رخ خان کے بالی ووڈ میں 27 سال مکمل ، مداحوں کی نیک تمنائیں

ممبئی: (کوہ نور نیوز) بالی ووڈ کنگ شاہ رخ خان کو بھارتی فلم انڈسٹری میں 27 سال مکمل ہوگئے اس موقع پر ان کے چاہنے والوں نے انہیں نیک تمناؤں سے نوازا ہے۔ 27 سال قبل فلم انڈسٹری میں دہلی کے ایک عام لڑکے نے بالی ووڈ میں قدم رکھا اور اپنی محنت، لگن اوربہترین اداکاری سے بالی ووڈ کنگ کا خطاب حاصل کرلیا۔ وہ لڑکا کوئی اور نہیں بالی ووڈ کے سپر اسٹار شاہ رخ خان ہیں۔ آج سے 27 سال قبل 25 جون 1992 کو کنگ خان کی فلم’’دیوانہ‘‘ریلیز ہوئی تھی اور اس فلم کے بعد شاہ رخ خان نے پیچھے مڑ کر نہیں دیکھا۔ شاہ رخ خان کا بالی ووڈ میں سفر آسان نہیں تھا انہوں نے اس مشکل سفر میں بہت سے نشیب و فراز دیکھے لیکن آج وہ بالی ووڈ کے کامیاب ترین اداکار ہیں۔ 27 سال مکمل ہونے کے موقع پر کنگ خان کے مداحوں کی جانب سے ان کے لیے نیک تمناؤں کا اظہار کیا جارہا ہے۔ ٹوئٹر پر شاہ رخ خان کے سب سے بڑے فین پیج ایس آر کےیونیورس نے ٹوئٹر پر کنگ خان کے بالی ووڈ میں 27 سال مکمل ہونے کی خوشی میں جشن منایا۔ مداحوں نے بالی ووڈ کو خوبصورت فلمیں دینے کے لیے شاہ رخ خان کا شکریہ ادا کیا۔ ایک صارف نے کنگ خان کی تعریف کرتے ہوئے کہا ہر انسان کو شاہ رخ خان سے سیکھنا چاہئے کہ ایک سادہ آدمی گلوبل آئکن کیسے بنا جاتا ہے۔ راہول نامی صارف نے تو شاہ رخ خان کی محبت میں ایک قدم آگے بڑھتے ہوئے کہا کہ بالی ووڈ کو 100 سال سے زائد کا عرصہ ہوگیا لیکن میں بہت خوش قسمت ہوں کہ اس دور میں پیدا ہوا جب شاہ رخ خان کروڑوں دلوں پر راج کرتے ہیں۔