ورلڈ کپ : پاکستان اور آسٹریلیا کے درمیان اہم میچ آج ٹاونٹن میں ہوگا

ٹاونٹن : (کوہ نور نیوز) ورلڈ کپ میں پاکستان اپنا اہم میچ آج دفاعی چیمپئن آسٹریلیا کے خلاف کھیلے گا، پاکستانی وقت کے مطابق دوپہر ڈھائی بجے شروع ہوگا تاہم میچ بارش سے متاثر ہونے کا خدشہ ہے۔ تفصیلات کے مطابق آئی سی سی ورلڈ کپ2019میں پاکستان اور آسٹریلیا کے درمیان اہم میچ آج ٹاونٹن کے کاونٹی کرکٹ گراونڈ میں کھیلا جائے گا، ٹاؤنٹن میں میچ ایک ہوگا، جیت کے امیدوار تین ہوں گے۔ سیاہ بادل رنگ میں بھنگ ڈالنے کے لئے پہلے سے پہنچ گئے۔ محکمہ موسمیات نے ٹاؤنٹن میں بدھ کو وقفے وقفے سے تیزبارش کی پیشگوئی کردی ہے۔ گزشتہ دو روز سے موسم آبرآلود ہے، جس کے باعث ٹیموں کو پریکٹس میں مشکلات درپیش ہیں۔ کپتان سرفراز احمد کا کہنا ہے کہ آسٹریلیا کو قابو کرنے کیلئے ہمیں جارحانہ کرکٹ کھیلنا ہوگی۔ آسٹریلوی کپتان فنچ نے کہا کہ پاکستان خطرناک ٹیم ہے۔ عامر کی سوئنگ واپس آگئی ہے، کھیلنے میں مشکلات ہوسکتی ہیں۔ ٹورنامنٹ میں آسٹریلیا دو اور پاکستان ایک میچ جیت چکا ہے۔ فاتح ٹیم پوائنٹس ٹیبل پر پوزیشن مستحکم بنالے گی۔ میگا ایونٹ کا یہ بڑا مقابلہ پاکستانی وقت کے مطابق دوپہر ڈھائی بجے شروع ہوگا۔