ملک میں طاقتور احتساب کی بنیاد رکھ کر عمران خان نے وعدہ پورا کردیا: فواد

ٹاؤنٹن: (کوہ نور نیوز) وفاقی وزیر برائے سائنس اینڈ ٹیکنالوجی فواد چوہدری نے کہا ہےکہ حمزہ، نواز شریف اور زرداری کی گرفتاری ملک کے روشن مستقبل کی علامت ہے جب کہ ملک میں ایک طاقتور احتساب کی بنیاد رکھ کر عمران خان اور پی ٹی آئی نے عوام سے کیا گیا وعدہ پورا کردیا۔ اسلام آبادمیں میڈیا سے گفتگو کرتے ہوئے فواد چوہدری نے کہاکہ ’(ن) لیگ اور پیپلز پارٹی والے دل پر ہاتھ رکھ کر کہیں یہ مقدمات جھوٹے ہیں، ان کے دل بھی ان کا ساتھ نہیں دیں گے‘۔فواد چوہدری نے الزام لگایا کہ ’سندھ کا پیسہ مختلف اکاؤنٹس میں ڈالا گیا، ایف آئی اے نے پانچ ہزار اکاؤنٹس چیک کیے جس سے پتا چلا کہ 31 اکاؤنٹس میں پیس ہجارہا ہے اور یہ سب اکاؤنٹس زرداری اور بلاول ہاؤس سے لنک تھے، یہ پیسہ دبئی، لندن اور فرانس جارہا تھا یہ سندھ کے غریب لوگوں کا پیسہ تھا‘۔ وفاقی وزیر نے مزید کہا کہ ’حمزہ، شہباز اور نوازشریف کا پیسہ کہاں جارہا تھا، یہ پیسہ بھی لندن اور مختلف ممالک جارہا تھا، یہ لوگ پاکستان کے لوگوں کی جیب سے پیسہ نکال کر اپنی جیبوں میں بھررہے تھے، جو پیسہ لوگوں کی غربت دور کرنے کے لیے آنا تھا، جہاں اسکول اور اسپتال بننا تھا، لوگوں کی خدمت ہونا تھی، وہ نہیں ہوسکی اور پیسہ باہر سے نکلا‘۔ فواد چوہدری کا کہنا تھاکہ ’دونوں خاندانوں کے حامیوں سے پوچھتا ہوں کس اخلاقی جرات کے ساتھ ان کا ساتھ دینے کی بات کررہے ہیں، کس اخلاقی جوازکے تحت بات ہورہی ہے کہ انہیں سیاسی انتقام کا نشانہ بنایا جارہا ہے، یہ پہلی مرتبہ ہے کہ سیاسی انتقام نہیں ہے، پچھلی حکومت میں دونوں جماعتوں نے ایک دوسرے کو بلیک میل کرنے کے لیے کیسز بنائے، مشرف نے جب نواز شریف کو گرفتار کیا تو احتساب نہیں ہوا ڈیل ہوئی‘۔ وفاقی وزیر سائنس اینڈ ٹیکنالوجی نے کہا کہ ’پہلی بار ملک میں ایک مضبوط احتساب کی بنیاد رکھی گئی، یہ اس لیے ضروری تھا کہ پی ٹی آئی کا منشور تھا، ہم نے جو عوام سے وعدہ کیا تھا، وہ یہ تھا کہ ہم ملک میں ایک طاقتور احتساب کی بنیاد رکھیں گے، اگر یہ نہ رکھتے تو ہم اپنے ووٹر سے بے وفائی کررہے ہیں، آج عمران خان اور تحریک انصاف نے یہ وعدہ پورا کردیا اور ایسے کیا کہ کوئی نہیں کہہ سکتا کہ سیاسی انتقام ہے، میرٹ پر لوگ گرفتار ہوئے‘۔ان کا کہنا تھا کہ ’زرداری، حمزہ شہباز یا نواز شریف کے کیسز میں اب کی بار کوئی گواہ یا زبانی شواہد نہیں، سب کاغذی کیس ثبوت ہیں، پیسہ باہر بھیجنے اور منگوانے کے ثبوت موجود ہیں، ریڑھی والوں، فالودے والوں، ڈرائیوز کے نام جعلی اکاؤنٹس کھولے، اربوں روپے جمع کرائے‘۔ فواد چوہدری نے کہا کہ ’پاکستان کی معیشت کی بری حالت کیوں ہے، ملک پر یہ لوگ قرض چھوڑ کر گئے ہیں، یہ لوگ 1250 ارب کا سرکلر ڈیٹ چھوڑ کر گئے، جس دن عمران خان نے حلف اٹھایا تو پتا چلا 10 ارب ڈالر واپس کرنے ہیں، زرداری اور شریف فیملی نے ملک کو اپنا گھر نہیں سمجھا، اس طرح تو دشمن بھی نہیں کرتے جو انہوں نے کیا، عوام نے دونوں فیملیز کو عزت دی، یہ لوگ پاکستان کو اس طرح نہ چلاتے جس طرح چلایا تو آج معیشت مستحکم ہوتی، ہمارے قیمتی سال ضائع کیے گئے‘۔ وفاقی وزیر کا کہنا تھا کہ ’عدالتوں کے فیصلوں کا خیر مقدم کرتے ہیں، آزاد عدلیہ نے یہ فیصلہ دیا، حمزہ، نواز اور زرداری کی گرفتاری پاکستان کے روشن مستقبل کی علامت ہے، جب اتنے بڑے ڈاکو پکڑے جائیں گے باقی کسی کو جرات نہیں ہوگی‘۔