پاکستان اور جنوبی افریقا کے درمیان چوتھا ون ڈے آج کھیلا جائیگا

جوہانسبرگ: (کوہ نور نیوز) پاکستان اور جنوبی افریقا کے درمیان 5 ایک روزہ میچز کی سیریز کا چوتھا میچ آج کھیلا جائے گا۔ دونوں ٹیموں کے درمیان سیریز کا اہم میچ جوہانسبرگ میں کھیلا جائے گا اور پاکستان وقت کے مطابق میچ دوپہر ایک بجے شروع ہوگا۔ سیریز میں میزبان جنوبی افریقا کو 1-2 کی برتری حاصل ہے اور سیریز میں رہنے کے لیے سرفراز الیون کو آج کا میچ لازمی جیتا ہوگا، میزبان ٹیم کی کامیابی کی صورت میں سیریز جنوبی افریقا کے نام ہوجائے گی، اس لیے قومی ٹیم کے پاس غلطی کی کوئی گنجائش نہیں۔ قومی ٹیم میں چوتھے ایک روزہ میچ کے لیے کسی تبدیلی کا امکان ہے، امام الحق اور فخر زمان کے اوپننگ کیے جانے کا امکان ہے جب کہ بابراعظم، محمد حفیظ، سرفراز احمد اور شعیب ملک قومی بیٹنگ لائن کا محور ہوں گے۔ بولنگ کے شعبے میں محمد عامر، حسن علی، شاہین شاہ آفریدی اور عماد وسیم اہم ہتھیار ہیں۔