اسلام آباد:(ویب ڈیسک) وفاقی وزیر برائے انسانی حقوق ریاض حسین پیرزادہ نے مغربی میڈیا کی پاکستان میں انسانی حقوق کی خلاف ورزیوں سے متعلق رپورٹس کو مسترد کردیا ہے۔ اپنے بیان میں ریاض حسین پیرزادہ کا کہنا تھا کہ 9 مئی کے بعد ہونیوالی گرفتاریاں انسانی حقوق کی خلاف ورزی نہیں،یہ ہماری قومی سلامتی کا مسئلہ ہے، دنیا کے ہر مہذب ملک کی طرح 9 مئی کے حملہ آوروں کے خلاف کارروائی قانونی تقاضا ہے ۔ انہوں نے کہا کہ 9 مئی کو پی ٹی آئی کے غنڈوں نے قومی و نجی املاک، حساس فوجی تنصیبات، ریاستی علامات پر حملہ کیا، مریضوں کو اتار کر ایمبولینسز کو آگ لگائی، سکول اور ہسپتال جلائے گئے، شہدا کی یادگاروں کی بے حرمتی کی، جناح ہاؤس، ریڈیو پاکستان اور اس کا نادر تاریخی ورثہ جلایا، ان جرائم میں قانون کے مطابق یہ غنڈے زیر تفتیش ہیں اور سزا پائیں گے۔ ریاض حسین پیر زادہ نے کہا کہ پاکستان ہی نہیں دنیا کے ہر ملک میں یہ جرم ناقابل معافی ہوتا ہے، کیپیٹل ہل امریکہ اور لندن فسادات میں حملہ آوروں کو سزائیں ملیں۔
