موجودہ دور کی جنگوں میں تینوں فورسز کا اشتراک کامیابی یقینی بناتا ہے: نیول چیف

کوئٹہ: (کوہ نورنیوز) نیول چیف ایڈمرل امجد خان نیازی نے کہا ہے کہ موجودہ دور کی جنگوں میں تینوں فورسز کا اشتراک کامیابی یقینی بناتا ہے۔ پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق نیول چیف نے کمانڈ اینڈ اسٹاف کالج کوئٹہ کا دورہ کیا جہاں کمانڈنٹ کمانڈ اینڈ سٹاف کالج نے نیول چیف کا استقبال کیا۔ نیول چیف نے مادرِ وطن کے دفاع کے لیے مسلح افواج کی قربانیوں کو زبردست خراجِ تحسین پیش کیا۔ انہوں نے سٹاف کورس کے شرکا سے خطاب کرتے ہوئے کہا کہ جدید فوجی آپریشنز میں اشتراک کو مرکزیت حاصل ہے۔ موجودہ دور کی جنگوں میں تینوں فورسز کا اشتراک کامیابی یقینی بناتا ہے، پاک بحریہ ہائبرڈ وارفیئر کے دور میں میری ٹائم سیکیورٹی چیلنجز سے پوری طرح آگاہ ہے۔ نیول چیف کا مزید کہنا تھا کہ پاک بحریہ ملک کو درپیش میری ٹائم سیکیورٹی چیلنجز سے نمٹنے کے لیے ہمہ وقت تیار ہے۔